新手請問- 有關草缸

» 鬧市冰室 » Freshwater Creature ◇淡水生物飼養討論◇ 顯示適合列印的版本寄給朋友

作者

新手請問- 有關草缸

根佬

文章: 44
來自: 香港柴灣

1 于 2004-08-09 10:26

各位大哥,師兄:
我係一位新手, 想起個草缸仔但完全不懂, 因此有些問題請教,....
1. 草缸既基本設備, 除了沙, 燈同過濾, 還需要什麼?
2. 16吋缸可以set 草缸嗎?
3. 用泥定沙做底較好?
4. 起缸既程序應該怎樣, 種那類草較好?
5. set 好缸之後, 要幾多天後才知穩定否?
6. 幾時可以放魚, 是不是燈魚或孔雀較合適?
實在太多問題, 唔好意思, 希望咁多位師兄可助小弟解決以上問題..
謝謝!

樂於助人, 自得快樂.....
缸 : 14X9X8
EDEN 501 - 生物環/生化綿/草泥丸
CO2 - 兩秒1泡
燈: 22W PL
魚 : 金條X7; 金青台X1, 女王X2; 維吉爾X2
草 : 水榕, 鐵皇冠, 綠松尾, 小對葉, 寶塔, 莫絲, 牛毛[$#27658], 紅蝴蝶

mareal

文章: 98

2 于 2004-08-09 11:27

1, 設備根據你養o既草種會有唔同, 水草有分陽性同陰性:
陽性草需要強光照, 加co2, 肥料組合亦比較多變化, 如果你有行過魚街水x店或水x世界見倒o既都係陽性草缸. 陽性草o係條件配合下生長極快
陰性草設備要求較少, 唔駛咁光, co2可有可冇, 生長緩慢, 唔駛成日剪, 但係一開缸買草o既支出比較多, 因為生得慢, 肥料亦冇咁講究, 太肥反而容易惹藻.

2, 16" 缸梗係得啦, 我見過最細o既草缸係 8"

3, 用泥對新手o黎講較好, 因為水草泥本身有肥, 而且某隻牌子o既泥仲可以將ph維持弱酸性, 對水草生長較好, 簡單o黎講即係唔駛太擔心肥同ph值方面, 顧少兩瓣. 用砂o既話因為砂本身冇養分, 仲要 keep唔住養分, 所以一般用砂ｏ既草友都要加基肥打底, 然後先鋪砂o係面, 而且砂o既選擇亦要小心, 一 D 含石灰質o既砂會令水o既kh同ph上升, 對水草唔好.

4,
落底床, 如果用泥記得唔駛洗嫁, 如果唔係好易散晒,
放水, 放水就盡量避量直接撞水落去, 會容易沖散 D 泥同濁到嘔.
放沉木, 插草,
著過濾養水幾日.
放魚.
養乜草就個人喜好, 不過一開波吸收經驗期就梗係種 D 平 D o既水草, 易種 D 嘛, 不過粗生都有問題, 成日剪.
少少 Tips, 如果你見 D 草越生越廋, 即係D葉越生越幼, 葉之間o既距離越來越疏, 大致上就係唔夠光o既徵兆

5+6, 四,五日左右都養得魚嫁喇, 心急 D o既兩,三日都照放, 穩陣 D o既就用 Tester 試, 殘忍 D o既就先放 D 平價魚做先頭部隊, 魚o既排泄物其實可以加速硝化系統o既建立, 對過濾系統係好o既, 而且如果唔係放左 D 特別容易令水質唔穩定o既o野, D 水好快定o既. 燈魚係好選擇, 大多數燈魚都唔會打交, 水草缸o既水質亦都幾適合燈魚. 孔雀就要較小心, 因為孔雀較適合小小鹼性o既水質, 養o係水草缸可能會燒尾. 其實其他魚好似麗麗都幾好養, 麗麗都好溫純, 唔會打交.

小弟都係養開草, 不過成日心郁郁想試下養咸魚, 所以o係度取下經, 如果水草方面有問題可以再交流下嫁, 事前了解多 D , 賴o野o既機會都低 D.

根佬

文章: 44
來自: 香港柴灣

3 于 2004-08-09 12:36

唔該哂, mareal 兄!
看過你的指導, 我還有以下幾個問題, 煩請賜教. 謝謝..
1. 我本身呢個係套缸, 缸頂濾, 材料係濾水棉同炭精, 足夠嗎? 燈唔係日光既, 略帶橙黃,平時開著都覺暗, 唔知需唔需要換呢?
2. 係咪落泥放左水之後先插草呢?..淨用泥定砂泥混好d?..要幾厚?
3. d 草買回來須要再處理過嗎?.我見一般既草都係一束束用濾棉裹著的..應該點做好?
4. 關於養草既密度, 請指導..thks
5. 沉木是否煮過刷乾淨插草既同時就可以落缸?
6. 用什麼tester 去測水?
太多問題, 唔好意思!

mareal

文章: 98

4 于 2004-08-09 15:11

1, 用套缸做草缸其實會有少少冇咁好, 我一開始都係用套缸, 後尾比我乜都換晒, 其實都冇乜o野o既, 係好似有少少o徙左原裝o既器材啫.
燈方面: 有一個簡單o既計算方法, 就係1L 大約需要 1W o既光照, 當然會有好多因素影響, 但係如果你個缸唔係特別形狀, 例如特別深咁, 一般都可以用呢個計法.
過濾方面: 咁多種過濾方式, 種草o黎計以用濾桶較好, 因為過濾o既水唔會接觸到空氣, 從而唔會將空氣由外界帶到水入面, 因為空氣進入水中會令水中o既二氧化碳含量降低, 由於水草o係燈光照耀下係需要耗用二氧化碳o黎進行光合作用, 所以咁咪會對種水草冇咁好o羅.
濾材方面: 有說活性碳會將養分都吸走, 但亦有人照用冇問題, 所以要你自己觀察水草o既生長情況o黎判斷

不過分開o黎講, 冇o野係絕對o既, 以上o既係一 D 理論上, 而我個人o既意見係, 你一切照用, 唔好心急, 換唔換就等開缸後睇情況啦.

2, 其實次序係冇定o既, 不過如果你先插草, 第一, D 草成 "pet" 撻o係度, 你又點睇倒插得好唔好睇呢? 而且放水o既時候又會容易沖甩 D 草, 所以咪放水先o羅, 如果你怕整濕晒o既咪放住半缸水先, 等插得咁上下先加滿佢.
你砂泥混o既意思係乜? 砂加水草泥? 我o既意思就係如果用砂要另加一層基肥o係底先, 因為砂本身冇養分嘛. 基肥同水草泥係兩樣o野o黎咕喎. 唔好亂撈呀, 呢樣o野搞錯左要反缸嫁.
厚度方面: 盡可能厚 D 會比較好, 厚 D 可以比多 D 空間比植物o既根生長, 不過梗係要就番你個缸o既深度啦. 一般起碼都要吋半啦, 厚 D 係好插 D 嫁.

3, 呢樣隨你喜歡, 不過如果要種得好, 點都要拆開o黎插, 處理方面, 沖沖水佢洗菜咁就得啦, 不過買番o黎o既水草有可能會有蝸牛卵, 你有心機o既可以逐塊草睇o既.....

4, 種養密度: 視乎草種唔同而有所差別, 不過一般大約隔半吋至一吋都得, 而特別 D o既例如矮珍珠, 牛毛毯等這些前景草就要插得比較密, 等佢地生成一片, 相反好似百葉類呢 D 就要插疏 D, 比多 D 空間佢地生長.

5, 可以, 係之後要留意下有冇甩色啫.

6, 我指o既 Tester 都係普通o既試劑, 可以 check 好多o野例如 ph, kh, no3 呀等等, 不過我相信主要都係 check 下ph 同 kh 就可以喇, 再有問題先 check 其他數值啦. 但係我自己就乜都冇 check 過, 剩係養左兩日水就放魚, D 紅蓮燈都頂得住, 我亦有聽聞 check 過晒所有數值冇問題都係咁死魚, 所以其實死魚o既因素實在太多試唔試就你決定喇.

之前講漏一樣:
溫度: 養水草水溫最好 keep o係 30 度以下, 過左未必會死, 但係就好有機會停止生長.

都好耐未試過打咁多中文字, 不過我唔驚o既, 有問題就即管放馬過o黎啦! hehee.......

根佬

文章: 44
來自: 香港柴灣

5 于 2004-08-09 16:00

Mareal 兄, 好多謝你咁詳盡既解答, 令小弟從中獲知很多寶貴意見, 不過煩到你真的不好意思啊, 請見諒! 在這還有些少問題, 煩請賜告:
1. 以前聽朋友講過, 一般桶濾由於馬力較大, 濾頻較高,不太適合用於細缸, 對嗎? 如果可以用的話, 用幾多watt 的濾桶比較合適呢 (我對濾桶完全不知, 唔好意思)?
2. 水草缸有過濾還須打氣嗎?
3. 溫度計set 28度, ok 嗎?
4. 是否放魚一星期後便開始每星期需要換少量水?

根佬

文章: 44
來自: 香港柴灣

6 于 2004-08-09 16:48

唔好意思呀,..還有一問:
用濾桶, 出水喉同入水喉既位置要注意嗎? 還是沒所謂呢?
哈哈..這是今天最後一問了...

mareal

文章: 98

7 于 2004-08-09 17:02

根佬 wrote:不過煩到你真的不好意思啊, 請見諒!

你真客氣, 唔好咁客氣啦, 我初初開始玩如果唔係有其他前輩指點下, 我都係多多錢都唔夠交學費呀. 而家叫做識少少, 扮下代表, 何樂而不為呢.

1, 以前聽朋友講過, 一般桶濾由於馬力較大, 濾頻較高,不太適合用於細缸, 對嗎? 如果可以用的話, 用幾多watt 的濾桶比較合適呢
你個朋友仔講得o岩呀, 一般濾桶o既水流真係好大嫁, 用o係細缸真係10號波嫁, 有見及此, 已經有廠商出左一隻細碼濾桶o岩細缸用, 就係EDEN 501 嘞, 死未?!

2, 水草缸有過濾還須打氣嗎?
如果魚仔o既數量唔係超多, 係真係唔駛嫁, 講到魚仔o既數量又有條簡單o既數計咕噃, 就係大約每 1L 水可以養一條 1" o既魚仔, 當然又係約數, 實際上你要睇番魚仔o既大細o黎調整番啦. 而且你又要睇下 D 魚仔有冇成日浦水面噃, 有又即係多魚得滯啦.
其實正式o黎講一個健全o既陽性水草缸o既氧氣來源應該係來自植物本身, 而唔係來自過濾, 你見魚街 D 水草缸就知, 佢地個缸 D 水草會周不時嘔泡出o黎, 呢 D 就係氧氣o黎啦. 不過呢樣o野可以遲一步, 因為係牽涉到頗大o既投資o既.

3, 溫度計set 28度, ok 嗎?
溫度計 set 28度? 你o既意思係咪支暖管 set 28度呢, 溫度計係用o黎量溫而唔係控溫咕噃. 暖管o既作用係加溫, 所以而家可以唔駛啦, 而家夏天水溫一般都有 30 度, 日頭仲分分鐘再多兩三度, 所以夏天o既就要諗計幫魚缸降溫, 例如加下吹水風扇咁啦, 暖管就要冬天先用, 因為我地養緊o既係熱帶魚同熱帶植物嘛, 冬天 D 水得番十零度O既時候就要用暖管加溫, 如果唔係 D 魚仔就會凍瓜晒啦, 至於比較適合養魚養水草o既溫度就係24 - 26度左右, 所以如果 set 暖管都係咁上下啦.

4, 是否放魚一星期後便開始每星期需要換少量水?
可以, 但係又要睇情況, 例如你如果見缸水好耐都清唔番, 就可以換密少少, 但係唔好大量噃, 例如原本每星期一次, 每次1/3, 就可以轉為每三日一次, 每次1/4 咁lu. 因為大量換水會容易帶走硝化細菌同令硝化細菌死亡, 當然你可以人手加番, 但係可免則免啦.

我本身其實有上開一個討論養水草o既網站, 叫水草情迷, 不過事先聲明, 我同o個個站係冇任何利益關係嫁, 不過o個度有好多養水草造景o既高手, 所以分享下咋, 你如果有興趣就可以睇下啦, 想養好水草o個度有好多人可以幫你, 當然仲有我啦, 不過你喜歡啦, 你如果o係呢度問o野我見倒又識o既就梗會答你o既, 不過其實因為小弟我都係幾個月貨仔, 萬一比你問到口啞啞就唔好啦

.....hehee.......

又打完一大篇中文, 如果仲有問題照樣放馬過o黎, 我依然係唔驚o既.... hehee.....

mareal

文章: 98

8 于 2004-08-09 17:11

根佬 wrote:
唔好意思呀,..還有一問:
用濾桶, 出水喉同入水喉既位置要注意嗎? 還是沒所謂呢?
哈哈..這是今天最後一問了...

大膽呀, 竟然趁我打緊字o既時候偷偷地問多條問題, 我唔驚o既.... hehee.......

出水喉同入水喉正常o黎講就打對面好 D, 有水流嘛, 不過又唔係話差太遠o既, 你自己就位啦, 就倒咪兩邊o羅, 就唔倒咪擺埋一齊o羅. 我兩樣都試過都差唔多啫.

根佬

文章: 44
來自: 香港柴灣

9 于 2004-08-09 17:27

Mareal 兄, 唔該哂!..聽完你講咁多我諗我有信心開始玩住先架啦...
經驗都需要實踐既...日後遇到疑難我實會向各位師兄請教過...
今日真的感激Mareal 兄 side 咁多時間答我既問題...
Mareal, thanks!

根佬

文章: 44
來自: 香港柴灣

10 于 2004-08-09 23:10

今晚終於都忍唔住起左個草缸, 可能冇乜經驗啦,d草插得都幾
凌亂... hehee... 插完之後發覺好似唔多夠位放沉木添...
其實好想問..放沉木除左美觀,仲有冇其他作用架?
仲有..每日開燈要幾耐....
又麻煩咁多位師兄.....thk you!

mareal

文章: 98

11 于 2004-08-10 09:17

插得凌亂冇問題, 自己覺得順眼就掂晒.

沉木可以降低 ph 值, 即係增加及保持水o既酸性.

一般水草, 每日 8 粒鐘, 陰性草就可以短 D, 三幾粒都夠, 紅色系水草就可以長 D, 10 粒鐘都得.

mareal

文章: 98

12 于 2004-08-10 09:19

插得凌亂冇問題, 自己覺得順眼就掂晒.

沉木可以降低 ph 值, 即係增加及保持水o既酸性.

一般水草, 每日 8 粒鐘, 陰性草就可以短 D, 三幾粒都夠, 紅色系水草就可以長 D, 10 粒鐘都得, 所以如果撈埋o黎種, 拉勻都係大約 8 粒鐘啦.

mareal

文章: 98

13 于 2004-08-10 09:19

插得凌亂冇問題, 自己覺得順眼就掂晒.

沉木可以降低 ph 值, 即係保持水o既酸性.

一般水草, 每日 8 粒鐘, 陰性草就可以短 D, 三幾粒都夠, 紅色系水草就可以長 D, 10 粒鐘都得, 所以如果撈埋o黎種, 拉勻都係大約 8 粒鐘啦.

» 鬧市冰室 » Freshwater Creature ◇淡水生物飼養討論◇ 顯示適合列印的版本寄給朋友

看過的文章

新的文章

被刪除的文章

跳轉到

我地有在新的聊天室
即時聊天廣播.

[Processing Time] User:1.42, System:0.21, Children of user:0.05, Children of system:0.14

請大家技持更換新主機啦, 多謝!