東瀛AV之旅 - 鬧市冰室

» 鬧市冰室 » Photo Share ◇圖片共享◇ 顯示適合列印的版本寄給朋友

作者

東瀛AV之旅

nebula

野外採集派

文章: 3888
來自: 華南以南

1 于 2003-04-05 13:26

看過友網Simfish兄的精彩文章，小弟又剛去日本一遊，手癢難耐，在此獻拙和大家分享今次旅程，多謝各位賞面。
其實自從在AV中看過朱古力波先生的精彩演出後（小弟認為其實力應在加藤鷹之上），我便無時無刻想有日能親自拜會切磋一下。但先要獲得我老虎的首肯先，於是猛落咀頭，潛移默化，一時和她說DisneySea開左不如去睇睇，一時又話表參道開左號稱全球最大的LV旗艦店，如果唔去真係枉稱LV Fan屎呀！又或者扮嘆氣：唉…咁大個仔都未睇過櫻花…諸如此類，總之不斷洗佢腦。終於…有日她同我講：得閒去搵D去日本的 Package的資料返黎睇下。心裡不禁高呼一聲Yes！一切盡在我掌握之中。
於是準備工作展開，首先要揀航班。很多旅行團都會利用UA往美國航班（會停留中途站東京），但我怕保安檢查，又驚炸彈，所以最後揀左JAL並選用新宿的酒店。跟住要草擬行程，上網找資料，好似築地市場的定休日，交通公具，賞櫻的地方等等…一切準備妥當，出發！（心水清的朋友可能已經發覺我做漏左D野）
但臨出發前的一晚，我接到一個在航空公司做野的朋友的電話說：喂，粉腸（朋友間的暱稱），我收到風話我朋友個friend個老友因為SARS單野，響泰國唔比入境，仲有香港好似唔再做日本簽證，飲益力多可防肺炎，飲馬騮尿真頭可以醫埋添，美國第七艦隊駛緊去南中國海，準備封鎖香港…等等。（後話：泰國政府話香港旅客要全程配帶口罩，唔通去游水，潛水，都要戴罩？唔明？）我心諗：錢都比晒，都要去試下，最多咪比日本仔隔離幾日或原機送返。
去到機場，整個氣氛如臨大敵，口罩已成為香港市民的標淮裝備—Bring your own mask，所有萬零，Circle雞都無晒貨，連消毒藥水都掃光。咦！咁我屋企果兩支滴露的升值潛力咪仲勁過波多紅酒，飲杯先。Check in 都好順利，但點解有人過關都唔駛除口罩？佢點知佢地唔係拉登？看來這是保安漏洞，葉劉真係要諗下計先得。上到飛機，我真係頂唔順，俾個口罩焗到暈，咳左兩聲。嘩！其他人即刻啤住我。唔駛下嘛…
~~~~待續~~~~

I believe in the Kingdom come Then all the colours will bleed into one But yes I'm still running
You broke the bonds You loosed the chains You carried the cross
And my shame and my shame
you know I believe it But I still haven't found
What I'm looking for.........

nebula

野外採集派

文章: 3888
來自: 華南以南

2 于 2003-04-05 13:27

Day 1 錯在新宿
一路無事終於抵達日本，無通櫃，無隔離，乜Q事都無。去到酒店都成六點幾，一於去附近打個轉，新宿真係好叉大，我由酒店所在的西口去到歌舞技町的東口，要行成廿分鐘咁耐，因為是星期六，所以沿途都好多人。歌舞技町和老旺差不多，都是燈紅酒綠之地，但今次去發覺少了扯皮條的人，感覺上好似沒有了已往獨有的氣味。另外有意去見識及出征的朋友要注意，偉大的祖國及菲島是此類服務業最大的勞動力輸出國，他鄉遇故知，不如留港消費好過。行左個圈，我就砌詞打發我老虎去行百貨公司，自已去搵我的偶像—朱古力波。弊！之前我咪話自已做漏左樣野，原來我從來無諗過朱古力波真名是甚麼？是巧克力波？Chocolate ball？走去問AV店的店員佢地都唔知，淨係識D AV女優的名字，最後我甚至比劃他的架生的長度，店員都是祇識賊賊地笑，雞同鴨講，真吹脹！祇好放棄此念頭，留待來日才再切磋。Mission failed。
跟住唯有改變策略，去睇魚。幾年前去過日本，知道歌舞技町附近有間新宿水族館，專賣淡水魚，並且有日本駐南美的採集者松榮考先生採集的稀有燈魚售賣。今次去到，原本已經執左笠，變成一間桑拿浴室，看來日本的不景氣已嚴重影響日本的水族業。咁樣點算？唔怕，仲可以去小田急百貨公司八樓的水族館，我諗應該唔會執笠埋掛。Yeah！果然仲響處，該店唔算太大，有咸有淡，咸水以賓魚及印尼魚為主，亦有少量珊瑚，淡水方面都非常一般，較為特別只有一種透明的和玻璃仙差不多外觀的Chanda sp.（產自曼加拉），約售二百多港圓一條。儀器方面以兩尺缸在下的本土設備為多，該店亦有造缸（亞膠力）的服務，但款式沒有甚麼特別…反而參考書籍就有很多，最後少不免破財，乖乖奉上日圓。

（我的收獲）

nebula

野外採集派

文章: 3888
來自: 華南以南

3 于 2003-04-05 13:29

Day 1 錯在新宿 (Part II)
離約番老虎仲有小小時間去邊好呢？千百個念頭在腦袋浮現—睇電器、打機、睇模型、漫畫…最終決定去南口的Tokyuhands和紀伊國屋書店。Tokyuhands是間賣雜貨的大型商店，亦是DIY狂的天堂，內裡甚麼都有得賣，熱門的文具，運動用品，冷門如化石開鑿用品，船舶用品，無一或缺。亞膠力膠管亦有多種口徑選擇，鍾意的話，絕對可以造支樹咁粗的skimmer玩下。紀伊國屋書店在新宿有兩間店，南口較大而人流較少。日本人的閱讀風氣甚盛（此點香港人就爭得遠），所以很多時都擠滿打書釘的人，亦甚少有人會干涉你。而通常我去外地的書店，都會睇下個暢銷榜先，了解下外國人的閱讀品味。咦！大部份都是英語進修書同電腦書，仲有薩達武同海灣戰爭的特輯（香港就通常都是果D心靈龜湯，是誰搬走我的雪櫃…果類心靈書），當然那些大大隻字寫住中國，朝鮮威脅論的都有市場。如果你問我紀伊國屋有多大？大約是台北誠品的三倍，香港銅鑼灣商務五，六倍左右啦。
睇到夠晒鍾，係時候搵番老虎去醫肚。落左單的女人購買力真係勁，連口罩都掃一堆番黎，乜叉Blue label Black Label又幾袋（飲果D我就識）。有D仲係幫人買添…我唯有化悲憤為食欲，去擦蟹好過。

qqleo

文章: 5294

4 于 2003-04-05 13:29

哈哈哈 ~~"飲益力多可防肺炎，飲馬騮尿真頭可以醫埋添"

"平有平玩, 貴有貴玩, 點都會諗到有得玩 !"

nebula

野外採集派

文章: 3888
來自: 華南以南

5 于 2003-04-05 13:33

（預告：Day 2 原宿周日怪物及Day 3 Palau Palau 水族店業況）

nebula

野外採集派

文章: 3888
來自: 華南以南

6 于 2003-04-05 13:53

Day 2 原宿周日怪物
第二日起身，我同我老虎講想去上野動物園睇動物，點知佢話不如趁星期日去原宿睇怪物好過。怪物？心裡非常疑惑。
不過趁時間尚早，去埋酒店附近的東京都廳同埋睇櫻花先。東京都廳都算是東京較高的建築物，四十五樓仲有免費的觀景台，可以飽覽整個新宿區的景色，天氣好的時候仲可以遠眺富士山添。

nebula

野外採集派

文章: 3888
來自: 華南以南

7 于 2003-04-05 13:54

觀景台外望

qqleo

文章: 5294

8 于 2003-04-05 13:54

哇 ~ 超時空要塞呀 !

"平有平玩, 貴有貴玩, 點都會諗到有得玩 !"

nebula

野外採集派

文章: 3888
來自: 華南以南

9 于 2003-04-05 14:09

Day 2 原宿周日怪物 (Part II)
在東京，熱門的賞櫻地方有上野公園和新宿御園，因為近的關系，我揀左新宿御園。可能已經是水尾的原因，所以沒有想象般壯觀，當然亦無見到D人好似係日劇般坐晒地下，流浪漢就大把！不過原本櫻花都有好多種，有D粉紅色，有D白色…

nebula

野外採集派

文章: 3888
來自: 華南以南

10 于 2003-04-05 14:47

Day 2 原宿周日怪物 (Part III)
行左陣，我老虎就催我走，話要去原宿。一出車站，我老虎就秤左我去代代木公園方向。啊！原來佢指的怪物是講果D扮到古靈精怪，核鬼突突的茄哩怪。心諗如果香港有人著到咁，一定俾人捉去域多利狗房檢驗，不過子非魚，焉知魚之樂。我都好佩服佢地的膽識。跟住行番去竹下通睇野，竹下通和女人街差不多，除非是假狗，義乳的擁戴者，否則我諗都無乜人對果D冒牌有興趣。全速開到表參道，以前表參道的意思是因為該處是通往明治神宮的主要通道，但現在可能有全新演繹，見到我老虎對住LV旗艦店的虔誠樣子就知一二。（在東京，我留意到大約六成的OL都拎住個LV）不過我老虎話售價約貴三成。難怪咁多水貨客響香港掃貨啦！跟住去埋裹原宿，睇下猿人Tee同埋波鞋又一Day。

nebula

野外採集派

文章: 3888
來自: 華南以南

11 于 2003-04-05 15:22

Day 3 築地市場及Palau Palau 水族店業況
如果我仲唔講魚，大家一定以為我玩野，所以點都要安排一下。築地市場分兩部份，外市場及內市場，內市場是批發市場，即是大家成日響電視見到，叫到鬼殺咁嘈個處，那裡沒有事先申請是不准訪客參觀的，所以通常好似我哩類遊客就是去外市場，睇下野，食下野咁，亦唔駛倒塔咁早就仆到去咁辛苦。

築地市場