Kenny wrote:
坦白講, 我個人之前係兩個網站/論壇o既版主. 除左初初被人邀請做版主時有份喜悅, 有dd優越感/成就感/滿足感, 覺得被該網o既網主/行政團隊所認同而有點雀躍; 除此之外, 過後其實同其他網友/會員係無咩分別, 卻要肩負一d無形o既使命/壓力. 而且, 只要你係有才能, 有學識, 有道理的話, 無論你以任何身份去出現係一個網站/論壇, 都會有人敬重你(亦都一樣有人會嫉妒你去搵機會挑剔你).

個人對版主o既職責睇法係 : 執行網主/壇主委派o既工作/下達o既指令, 處理/整理/排列好一d重要o既資料, 維持網站論壇日常運作o既秩序, 封鎖/刪除一d違規o既發言和貼圖; 除此之外就同一般會員無分別(如果你要睇作呢d為特權, 也無不可).

相信大多係到上線o既朋友都係有工作有家室o既成年人, 為左自己o既興趣同嗜好百忙中抽空時間上黎o既同好. 平時為工作為家庭已經好忙碌好多煩惱, 難得可以偷空一d時間黎做一d自己喜歡o既野; 開心一下輕鬆一下.

要知道做版主係義務性質, 係完全無任何酬勞可言(別人會唔會有一d小利益或優惠就唔知道). 點解要為左個虛名而額外令自己去多辛勞, 多承受壓力, 令到自己百上加斤? 我相信大多o既版主都係一樣, 除左去報答知遇之恩外, 同時亦係因為對果個網站/論壇產生左歸屬感, 希望可以好好地維持落去, 而願意多付出一分力; 使到自己同大家仍可以繼續享用呢個精神o既休憩地/心靈o既棲所.

版主都係人, 都有倦o既時候, 都有心情低落o既時候, 都有忙或想偷空去做其他野o既時候; 既然版主只係義工, 大家又可唔可以豁達咁包容一下佢地o既一時疏忽/犯錯, 甚至乎偷懶呢? ^^"

其實, 只要大家都係有心人, 就算唔係版主亦都可以分擔到一d較簡單o既工作. 正如catlee所講, 網主又好, 版主又好, 有無有關o既經驗同學識其實都不太重要(有當然就更有說服力啦), 除左要處事公平公正外, 我覺得最重要係有無"心". 就正如係呢幾日以黎, 有不少有心o既冰室茶客佢地雖然唔係伙計, 但佢地都幫手做緊伙計o既職責之一, 協助調停茶客中o既不滿同紏紛, 印象最深刻者, 首推青蛙嚕.

坦白講, 做左版主就成日要同自己講, 提醒自己就算幾忙都好, 記得抽空時間上去睇下check下 post喇. 死喇! 又唔記得左添, 返到屋企一定要上. 點知又夜返, 返到去好疲倦, 好快就訓著左...... 點解要自己咁辛苦呢? 做個普通會員唔係更好嗎? 鍾意幾時上就幾時上, 唔上就唔上; 又可以暢所欲言, 唔駛顧忌.

係度咁多年, 睇住鬧市成長發展至今, 我都老了, 亦都開始覺得有點疲累, 有點心力交瘁, 係時候告老還鄉, 歸園田居嚕. 希望各位有心o既生力軍, 可以繼續為鬧市發揚光大.

容我係度哼一哼吧 ^^"
一...枝竹...會易折彎......幾枝竹一扎斷折難...............