sammy仔
 
文章: 797
 |
 1 于 2003-06-07 11:29   
以下乃節錄魚友Sim Fish 在 hksaltfish 的作品:
近排好似又多左好多新魚友加入海水魚佬網，
Member Number已過１８００！邁向２０００．
首先恭喜哂海水魚佬網先．
同時亦有好多魚友嗌救命，要網友幫手救魚醫魚．
魚網各高手亦講左唔少救魚方法，相信已經救魚無數．
大家得益不淺．
咁啱又有網友問起小弟關於較少人提及之Methylene Blue淡水浴療法．
所以小弟就特別開個Topic講講．
等大家參考下．
其實我之前都講過幾次點用Methylene Blue，
作為新魚淡水浴暨轉水方法．
由其是對冇Q Tank用既魚友更加要重要．
（好在冇打漏個Tank字）
因為咁耐都睇唔到第二個人提過，都算秘技嚟嫁．
不過搵唔返個自己以前D Posts.
又要再講過．
最慘係，又要再打過成篇字．
講方法之前，又先講下耶穌先．
要知道,一條新買既魚發病死亡,
原因可能性太多, 但離不開三點：
1/ 魚缸水質唔理想
2/ 魚本身健康狀態已經唔好
3/ 轉水不正確
頭兩點唔講嘞，而轉水係一般新手忽略既重要步驟．
轉水轉得唔好，魚魚頭幾日睇落冇事，之後就嚟料，
到時大家又唔知點解條魚無端端病發．
而Methylene Blue除左可用喺新魚轉水，
亦可用喺治療大部份Fungus, Bacteria ,Protozoa引起之魚病．
Methylene Blue咁巴閉？究竟係乜嚟嫁？
Methylene Blue亞甲藍(C16H18ClN3S)，係一種有强氧化功能既染液．
大家睇睇佢既化學結構圖，幾威猛！
喺細菌學上用嚟做核染劑nuclear stain (both DNA and RNA)，
醫生喺手術前都係用佢嚟喺病人身上劃定開刀位置．
佢至巴閉係用嚟醫高鐵血紅蛋白症（methemoglobinemia），
某Ｄ地區水源被農藥污染，含過量硝酸鹽NO3,
當地人，特別係ＢＢ長期飲用，會患高鐵血紅蛋白症．
患者紅血球輸氧功能喪失，令腦部等器官受損．
Methylene Blue可回復紅血球輸氧功能．
同樣地，Methylene Blue亦用嚟醫治中生矣毒（氰化物Cyanide毒）患者．
因生矣毒性亦在於令細胞色素氧化酶cytochrome oxidase
(cytochrome aa3)功能喪失，影響細胞既呼吸作用．
更有人用佢嚟醫Priapism．
Priapism係咩野病？唔關你事個喎．
好啦，話你知啦，即係陰莖持續勃起症！
閣下啱使既話，不妨試下．
不過Methylene Blue喺醫治魚病方面已有好耐歷史．
特別係淡水魚方面，Methylene Blue亞甲藍同Malachite Green孔雀綠，可謂係醫魚孖寳．
而Methylene Blue亞甲藍比孔雀綠更溫和，對魚甚至魚卵都冇害．
用喺一Ｄ對銅藥敏感既魚身上一樣ＯＫ．
不過佢對植物同慮材有染色作用，最好就另外用魚缸或容器作治療平台．
否則喺主缸用後，要漸次地更換慮材．
所以Methylene Blue用嚟同魚魚做淡水浴療就Perfect嘞．
對醫治白點病及更難搞既Velvet(即海水卵圓鞭毛蟲引發之絨毛病，
兩種致病體都係Protozoa原生動物），都好有效．
況且，原來佢仲可以減輕用生矣捕獲既魚魚體內毒性．
更可減低魚魚可能於袋水中硝酸鹽NO3毒之毒性,
我真係諗唔到有咩藥好得過佢，用嚟做新魚淡水浴既溶劑嘞．
但係唔知點解喺香港既海水魚界就唔係好流行．
反而好多人去試五花八門，不同既藥．
將Ｄ魚魚做左魚藥廠既白老鼠．
當然家陣Ｄ藥比較針對性，對某Ｄ病的確有功效既，
不過就要大家慢慢去試嘞．
好嘞，終於講到入肉嘞．
新魚淡水浴暨轉水步驟：
1/預早整定一桶已Conditioned之淡水，
即已用water conditioner去氯除毒之淡水，
或用ＤＩ／ＲＯ水．
用化學盬調較ＳＧ到１．０１
留意水溫會否與缸水相差太遠．冷天要用暖管保溫．
2/加適量ｐｈ ｂｕｆｆｅｒ令淡水ｐｈ值與主缸水接近．
因水喉水及魚袋水之ｐｈ值一定低於缸水．
3/根據產品指示份量，將Methylene Blue滴落淡水中，
幾滴已足夠令一個２０Ｌ容量之水桶中既水變得好藍．
4/用氣泵打氣．
5/用另一個容器，如較細桶仔連袋水放魚魚其中，
慢慢將淡水與魚袋水互溝，打氣．令魚慢慢適應．
6/十幾分鐘後，魚慢慢適應左淡水成份，
可將魚放入Methylene Blue淡水液中，
正式進行淡水浴．繼續打氣．加蓋，令魚安定．
7/密切留意魚之狀況，見有乜唔妥，要即時終止淡水浴．
8/10-15分鐘後（視乎魚之ＳＩＺＥ及狀態），淡水浴完畢．
用同樣方法轉水，將淡水和缸水
（ＯＲ Ｑ ＴＡＮＫ水）慢慢互溝．
9/當魚已完全浸入缸水之水桶，適應缸水之水質之後，
有Ｑ ＴＡＮＫ既就可放入Ｑ ＴＡＮＫ，
冇就用篩將魚魚放入魚缸，進行『篩魚調教』，
10/『篩魚調教』即教育魚魚食魚糧，
及讓新魚獨處灰復體力，及與舊魚魚互相認識下先．
唔好急於放魚落缸，等魚魚開口食魚糧後至放都未 遲．
就算即開口都要忍．因魚魚一落缸，若被惡魚恰．
可能又收返口．
一般由篩佢兩三日，三五七日，至一兩個星期都有．
日後大吉利是，魚魚有白點，ｖｅｌｖｅｔ等病徵，可照版煮碗咁同魚魚做Methylene Blue淡水浴療．
當然上述所講一切步驟，當中Methylene Blue可用其他閣下有信心之藥液代替，
但Methylene Blue對魚魚，甚至好多invertebrates
都安全．而且價錢好ｃｈｅａｐ．
如圖中ｐｒｏｄｕｃｔ，都係廿零蚊，每次用幾滴，有排用．
最後再講埋，魚魚病發死亡原因甚多．
若閣下依足方法，依然死魚，就要睇睇仲有咩野其他地方唔妥．
係咁先 |
|
顯示適合列印的版本 
寄給朋友
